إنتباه يا معلمين.

الورق المطلوب من الشاب المتقدم للتجنيد :

1- أصل الشهادة المؤقتة أو بيان النجاح >>>> موجودة في الملف بتاعك اللي سحبته من الجامعة.
2- أصل شهادة ميلاد كمبيوتر >>>> موجودة في الملف بتاعك برده.
3- استمارة 6 جند أو الرقم الثلاثي >>>> موجودة في نفس الملف اللي سحبته.
4- فصيلة دم >>>> بتعملها من أي مستشفي حكومي أو من أي عيادة خارجية المهم لازم يكون موجود عليها ختم النسر.
5- الفيش الجنائي >>>> من أي قسم جانبك تعمل فيش جنائي مستعجل "مستعجل مش عادي".
6- البطاقة الشخصية >>>> صورها وحط الصورة مع الورق.
7- القيد العائلي >>>> بتروح تعمله من أي سجل مدني زي اللي في شارع الهرم جانب كايرو مول.
لما تروح السجل المدني في ورق لازم تاخده معاك :
- قسيمة زواج الأب والأم. "أصل وصورة"
- شهادة ميلادك انت واخواتك والأب والأم. "أصل وصورة"
- صورة بطاقتك انت واخواتك والأب والأم.
ملحوظة: وانت هناك في السجل المدني طلع شهادة ميلاد ليك تانية احتياطي.
8- ثلاثة صور شخصية >>>>لازم تكون من غير ذقن وتكون خلفية بيضاء. "ولو هاتروح تتصور عند روتانا ماتخليهوش يلعب في الصورة".

بعد كدة بتاخد الورق ده كله وتروح قسم الهرم (ده لوكنت تابع لمنطقة الجيزة غير كدة مش عارف) علشان يديك حاجه اسمها " الفيش الثلاثي " بتروح تعمله من القسم اللي انت تابع ليه, وترجع بيه وهو معمول لقسم الهرم تاني علشان يقولك ميعاد الكشف الطبي.

ملحوظة هامة: كل الورق اللي انت عاملته ده صور منه 3 نسخ ماعدا الشهادة المؤقتة تصور منها 5 نسخ.
ويوم الكشف الطبي تاخد الورق ده معاك ولازم تكون حالق ذقنك وسوالفك وشعرك بس مش ع الآخر يعني (يعني نمرة 4 مثلاً) وخد معاك قلم وأكل وشنطة كتف تحط فيها الهدوم اللي هاتقلعها وتروح بدري الساعة 7 صباحاً في منطقة التعبئة (اللي قبل نادي الرماية وانت نازل الجيزة واسأل السواق قبل ماتركب "تجنيد يا اسطي") علشان ماتتلطعش هناك كتير.

واللي مش فاهم حاجة يروح قسم الهرم يسأل بنفسه, ولو عايز واسطة هناك قل لأي عسكري أنا تبع أحمد حسين أو العميد عبد الرحمن فاروق أو إسلام شرطة عسكرية أو عمرو نيابة عسكرية أو الشيخ عبد السلام.

تأجيل إن شاء الله ...

تم إعداد البتاعة الطويلة دي بناءً علي طلب محمد عبد الرحمن.